Amawulire

Nabakooba alagidde okunonyereza kukolebwe

Bya Barbra Nalweyiso

Minisita w’eby’ettaka Judth Nabakooba Nalule ayingidde mu nkayana z’ettaka eryagabibwako ebyapa e Kyatebe mu ggombolora y’e Nalutuntu mu disitulikiti ye Kassanda.

Minisita okugenda e Nalutuntu kiddiridde abantu baayo okwekubira enduulu oluvannyuma lw’abantu 2; okuli David Kabagambire ne Hajj Faiz Mohamed Wasswa okufuna ekyapa kya Freehold ku ttaka lino mu mankwetu nga beeyambisa akakiiko k’eby’ettaka ku disitulikiti e Mubende.

Abatuuze bagamba ettaka eryo lyali lya gavumenti nga bebateekeddwa okuweebwa omukisa ogusooka, ekitakolebwa nga baakuba ebyapa ku Ploti 175 ne 176 mu Kyannamugera Estates.

Minisita alagidde RDC w’e Kassanda ne ssentebe wa disitulikiti okukwatagana n’akakiiko k’eby’ettaka baddemu okwekkaanya ebyasalibwawo mu lukiiko mwebayisiza ekyokugaba ettaka lino.