Amawulire

Museveni ali Serere anonyeza munna NRM kalulu

Bya Prossy Kisakye,

Pulezidenti Museveni ali mu bitundu byé Serere ng’anoonya obululu bwa munnakibiina kya NRM Phillips Oucor mu kudamu okulonda omubaka wa palamenti akikirira abé Serere County mu kulonda okugenda okubaawo ku lwokuna luno nga 23rd February.

Asabye abalonzi okwettanira manifesito za NRM okusobola okulaba kunkulaakulana mu kitundu kyabwe.

Museveni alaze obwetaavu bw’okulonda abakulembeze abalina obusobozi bokka abagenda okulwanirira enkulaakulana y’ekitundu kyabwe mu kifo ky’okwesigama ku bika, eggwanga, oba eddiini.

Alabudde abakulembeze obutasasula nguzi okusobola okulondebwa mu bukulembeze na balonzi na bakuutira okwewala ababawa enguzi okusobola okutunda obululu bwabwe.

Akalulu kano kalimu abantu bataano okuli Alice Alaso owa The Alliance for National Transformation ng’awagirwa ekibiina kya National Unity Platform ne National Economic Empowerment Dialogue, FDC ekiikirirwa Emmanuel Eratu ne Phillip Oucor owa NRM n’abalala.

Ekifo kya kino kyasigala kikali oluvannyuma lw’omubaka w’ekitundu kino Patrick Okabe ne mukyala we okufiira mu kabenje mu December w’omwaka oguwedde.