Amawulire

Mubajje apondose e Masaka

E Masaka ekibinja ky’abayisiraamu ekiwagira Mufti  Sheikh Shaban Mubajje kipondoose nekikyuusa omuzikiti webagenda okumukyaliza ku Juma y’enkya oluvanyuma lw’abalala okuwera okutaataganya enteekateeka eno.

Omubaka wa pulezidenti e Masaka  Linos Ngompek ategezezza nga bwebatuuse ku nzikiriziganya wakati w’ekiwayi ky’e Kibuli ekikulemberwa Supreme Mufti Sheikh Zubai Kayongo n’aba Old Kampala Mufti Mubajje aleme kusaalira ku muzikiti omukulu e Masaka agende ku gwe Kitenga.

Ngompek agamba kino kigendereddwamu kuziyiza kavuyo konna.

Ofiisi ya Mufti omwezi oguwedde y’awandiikira poliisi e Masaka nga babategeeza ku kukyaala kwa Mufti mu kitundu kino mu Kawefube gw’aliko ow’okugatta abayisiraamu oluvanyuma lw’enjawukana.

Wabula abakulembeze b’abayisiraamu okuva mu  Greater Masaka kino baakisimbira ekkuuli kubanga bali wansi wa Supreme Mufti sheikh , Zubairu Kayongo.