Amawulire

Minisita Agness Nanduutu yetutte ku kitebe kyaba mbega e Kibuli

Bya Rita Kemigisa,

Minister omubeezi ow’ensonga z’e Karamoja yetutte ku kitebe kyaba mbega e Kibuli enkya ya leero oluvanyuma lwakukulungula ennaku eziwerako nga yetaagibwa okubaako byanyonyola ku nsonga z’amabaati.

Nanduutu afuuse Minister ow’okusatu okuvunaanibwa ku nsonga z’amabaati oluvanyuma lwa mukama we Mary Gorette Kitutu ne Minister Omubeezi ow’eby’ensimbi Amos Lugoloobi.

Bano ababiri basimbiddwa mu mbuga z’amateeka omu neyeyimilirwa ate Minister Lugoloobi akomezebwawo ku lwokuna eri embuga okuwulira okusaba kwokweyimilirwa wekutuuse.

Minister Lugoloobi yakwatibwa ku lunaku lwa kutaano nateekebwa mu kaduukulu okutuusa olunaku lwa bbalaza lweyaleteddwa mu kooti ewozesa abakenuzi  e Kololo, oluvanyuma eyamusindise mu komera e Luzira okutuusa ku lunaku lw’okuna olwa sabiiti eno.

Eby’okwerinda ku kitebe kya bambega e Kibuli byongende okunywezebwa nga tewali munnamawulire akkiriibwa kuyita ku wankaaki.

Wabula tekinnategerekeka oba nga Minisita Nandutu olunaava awo anatwalibwa butereevu mu Kooti oba nedda.