Amawulire

Gavt Omusinga Wesley Mumbere emugyeko emisango

Bya Ruth Anderah,

Gavumenti eggye emisango gy’obutujju egyali gyatekebwa ku Musinga wé Rwenzururu Charles Wesley Mumbere, n’abalala 217.

Gavumenti wabula, esazeewo okuvunaana Ssaabaminisita w’o Businga bw’e Rwenzururu Thembo Kasubire ne Mashereka Kamada.

Omulamuzi Alice Komuhangi okuva mu ekitongole kya International Crimes Division mu kkooti enkulu alagidde nti abali ku limanda mu kkomera e Jinja, e Luzira n’abali ku kakalu ka kkooti baweebwe eddembe lyabwe mu bwangu.

Kino kiddiridde oludda oluwaabi olukulembeddwamu Lillian Omara okwanjula empapula mu Kkooti eziraga nti gavumenti tekyalina bwagazi mu kugoberera musango guno.

Mumbere ne banne babadde bavunaanibwa emisango egiwerako omuli obutujju, obutemu n’okugezaako okutta omuntu.

Kigambibwa nti emisango gino baagizza wakati w’emyezi gya July ne November 2016 ku kyalo Bukara, mu ssaza ly’e Kabonero ne ku kyalo Nyabutsi, mu ssaza ly’e Karangura mu disitulikiti y’e Kabalore.