Amawulire
Besigye ali kalangala, Mbabazi Gomba, Museveni Hoima , Barya ali mu kibuga
Akwatidde ekibiina kya FDC bendera Dr. Kizza Besigye asimbudde okwolekera ebiznga bye Kalangala okwongera okusaggula akalulu akanamutuusa ku bukulembeze bw’eggwanga.
Besigye awerekeddwako ssenkaggale w’ekibiina kya FDC Maj Gen Mugisha Muntu, loodi meeya wa Kampala Erias Lukwago ssaako n’abakungu b’ekibiina abalala.
Besigye wakuyitako e Bubeke oluvanyuma agende e Kifumbira mga era wakukuba enkungaana ku mwalo gwe Mwema e Bujumba, wamu n’olukungaana lwe olunasembayo mu tawuni ye Kalangala ku ssaawa 10 ez’olweggulo.
Ye omukulembeze w’eggwanga era akwatidde ekibiina kya NRM bendera Yoweri Museveni agenze Kibaale ne Hoima.
Museveni wakukuba olukungana lwe olusooka ku ssomero lya St Albert Senior School mu gombolola ye Bugangaizi olwo agende e Kiziranfumbi secondary.
Oluvanyuma wakukuba olukungaana olusembayo ku kisaawe kye Boma mu municipaali ye Hoima.
Eyesimbyewo ku bwanamunigina Prof Venasius Baryamureeba ye akyatalaaga Kampala olunaku lwe olwokubiri.
Olunaku olweggulo yakubye enkungaana e Gaba, Buziga Makindye n’ebitundu bye Nsambya nga era y’asuubizza bannakampala empeereza y’emirimu ennungi singa banamulonda ku bukulembeze bw’eggwanga.