Amawulire

Besigye agaaniddwa okugenda mu Lukungaana

Bya Abubaker Lubowa

Poliisi eganye eyaliko senkaggale wa FDC Dr Kiiza Besigye okugenda okwetaba mu kukubaganya ebilowoozo ku mulamwa gw’okuzimba omukutu gw’okusaabaza amafuta ogwa EACOP.

Dr Besigye atuuse ku Emrald Hotel ku luguudo lwa bombo road awabadde wategekeddwa okukubaganya ebilowoozo kuno wabula kimubuseeko bwasanze ng’ekubo lisuuliddwamu omusanvu nga likuumibwa n’abasirikale okubadde Poliisi n’ab’amagye.

Poliisi emutegeezezza nga bwewatabadde muntu akkirizibwa kuyingira hotel nga talina kukkirizibwa kuvudde eri Omuduumizi wa Poliisi Martins Okoth –Ochola.

Okuva wano Dr Besigye awerekeddwa kabangali za Poliisi okumutuusa ku offisi ze ezisangibwa Katonga Road mu Kampala.

Bino bigenze okubaawo nga abakungu ba gavumenti bangi bakungaanidde mu district y’e Kikuube awali okutongozebwa kw’omulimu ogugenda okutandika okusimula amafuta ga Uganda nga President Museveni yasuubirwa okubeera omugenyi omukulu.