Amawulire

Asse mukwano gwe lwa shs 5000

File Photo: Sente za uganda

Poliisi ye  Masaka eri ku muyiggo gw’omukazi agambibwa okusindikira munne  laddu n’emukuba n’emutta nga agenze  okumubanja 5000.

Gertrude Nanyanzi omutuuze ku kyalo  Nakitokoro  mu gombolola ye  Bukakkata y’awenjezebwa ku bigambibwa nti y’asse munne Zaina Kantaro 23, lwa 5000.

Poliisi egamba nti ebiriwo biraga nga  Kantaro bweyafiiridde mu maka ga  Nanyanzi gyeyabadde agenze okukima balansi we ow’enkumi 5000 oluvanyuma lw’okumuguza embaata 3 ku mitwalo 35000.

Abatuuze bagamba nti  Kantaro yakubiddwa laddu n’akalirawo nga teri kulonzalonza Nanyanzi yeyamuloze.

Bewunya nti ekire ky’enkuba kyayiise amangu ago n’ekyaddiridde laddu nekuba munaabwe ate ye Nnanyanzi n’abinyika mu nsuwa.

Omwogezi wa poliisi mu bukiika ddyo bw’eggwanga Noah Sserunjogi agamba bakyayigga Nanyanzi nga okunonyereza bwekukyagenda mu maaso.