Amawulire

Amerika akungubagidde munnamateeka- aziikwa lwakuna

Gavumenti ya Amerika ezzeemu okweyama okukwatagana ne Uganda mu kulwanyisa obutujju

Mu bubaka bw’eggwanga lino obw’okusaasira olw’okuttibwa kw’amyuka ssabawaabi Joan Kagezi, gavumenti ya America egambye nti tekkiririza mu bikolwa bya mivuyo kubanga bya kititiizi n’asaba abantu bonna okuvaayo okulwanyisa obutujju.

Gavumenti ya Amerika era etuusizza okusaasira kwaayo eri abaana, ab’enganda n’emikwano gya Kagezi

Bano bagamba nti Kagezi ajja kujjukirwa ng’omukyala omuvumu eyalwanirira emirembe n’obutebenkevu mu ggwanga lye

Kkyo ekibiina ekigatta abawolereza gavumenti nakyo kivuddeyo ku kufa kwa memba waakyo nga kisabye wabeewo obukuumi eri bannakibiina abakola ku misango eminene ng’obuzigu, obutujju, okulya mu nsi olukwe n’emirala

Amyuka akulira ekibiina kino David Bakibinga agambye nti bannamateeka basaanye okufuna abakuumi ate ng’abatonotono abatakola ku misango minene beetaga okubeera n’emmundu

Yye eyali akulira ekitongole ekikessi ekya gavumenti Gen David Ssejusa agamba nti ettemu erigenda mu maaso mu ggwanga kabonero akalaga nti abantu bekyaaye

Ssejusa agambye nti abantu batuuliddwa tebalina webayita kwogera nga kati bazze mu bikolwa bya mivuyo

Ssejusa agamba nti eggwanga lyetaagamu abakulembeze abapya ebintu bwebiba byakutereera

Ofiisi ya ssabawaabi wa gavumenti efulumizza enteekateeka z’okuziika abadde amyuka ssabawaabi Joan Kagezi

Omwogezi wa ofiisi eno, Jane Kajuga agambye nti wajja kubaawo olumbe mu maka g’omugenzi e Kiwaatule

Ku lw’okuna omugenzi wakusabirwa kkanisa ya St Luke Church Ntinda ku ssaawa nnya.

Omugenzi oluvanyuma anaazikibwa ku ssaawa kkumi ku kyaalo Bukasa Buloba ku luguudo lwe Mityana