Amawulire

Abagaala obwa pulezidenti bewandiisa wiiki ejja

Abagenda okwesimbawo ku bwapulezidenti mu kulonda kw’omwaka ogujja bakutandika okugyayo empapula z’okususulibwa okuva eri akakiiko k’ebyokulonda wiiki ejja.

Okusinziira ku nteekateka efulumiziddwa akakiiko k’ebyokulonda mu ggwanga , abagenda okwesimbawo balina okugyayo empapula okuva nga 17 August  olwo okusunsulibwa kutandike nga 5 October okutuusa nga 6 omwezi gwegumu.

Amyuka ssentebe w’akakiiko k’ebyokulonda  Joseph Biribonwa agamba abagenda okwesimbawo ku bukiise bwa palamenti bakusunsulibwa okuva nga 2 okutuusa nga 3 December.

Biribonwa agamba abagenda okwesimbawo ku bwapulezidenti bakusasula obukadde 8 ezitaddizibwa sso nga abaagala okukiika mu palamenti balina kusasula emitwalo 20.

Asabye abagenda okwesimbawo okutandika okugyayo foomu z’okusunsulibwa okuva ku mande era n’ategeeza nga bbo abagenda okwesimbawo ku zi disitulikiti bwebagenda okusunsulibwa ku bitebe bya disitulikiti okuva nga 2 December 2015.

Mungeri yeemu amanya g’abali ku nkalala z’abalonzi agaliko akabuuza gakutandika okutimbibwa olunaku lw’enkya ku miruka gyonna.