Amawulire

Aba DP bakulonda pulezidenti omuggya omwezi ogujja

Ab’ekibiina kya DP balangiridde olunaku lw’okutegekerako ttabamiruka omugenda okulondebwa abakulembeze abapya.

Ttabamiruka ono wakuva nga  23 okutuusa nga 26 omwezi ogujja nga era baakulonda ssenkagale w’ekibiina omuggya omumyukawe, ssentebe w’ekibiina mu ggwanga nebassentebe b’ebitundu ebyenjawulo.

Omwogezi wa DP Kenneth Paul Kakande agamba abakungu b’ekibiina kino abasoba mu 1500 bebasuubirwa okwetaba mu ttabamiruka ono okuva mu bitundu by’eggwanga ebyenjawulo.

Omuntu yenna okwesimbawo ku bwassenkagale bw’ekibiina kino alina okuba nga abadde atambuza emirimu mu kibiina kino emyaka 5 ssaako n’okusasula obukadde bwa siringi 2 ezitamuddizibwa.

Abaagala okwesimbawo ku bw’omumyuka bwa ssenkagale ne ssentebe balina okusasula akakadde kamu n’ekitundu wamu n’okuba nga babadde mu kibiina waakiri emyaka 3.

Bbo ba ssentebe b’ebitundu ebyanjawulo balina okusasula akakadde kamu ezitakuddizibwa.