Amawulire

Mbabazi asimbudde okwolekera Mbale

File Photo: Mbabazi nga awandiika ku T-shirt yo mu ku bawagizi be

Eyali ssabaminista Amama Mbabazi asitudde okwolekera Mbale yadde nga poliisi yamulabudde obutakigeza.

Mbabazi ali mu motoka kika kya Benz era ng’awerekeddwaako endala gyebamukelera mu kitiibwa kye ng’eyali ssabaminisita.

Bannayuganda abasinga batunudde nkaliriza okulaba oba eyali ssabaminisita w’eggwanga Amama Mbabazi anatuukiriza eky’okugenda mu bitundu bye Mbale okwebuuza ku balonzi be nga bweyasuubizza yadde nga poliisi nayo emweweredde.

Mbabazi yaweze nti nebwekunaaba kubuuka mamaba za poliisi wakigenda e Mbale nga ne poliisi yeswanta kumulemesa kubanga ab’ekibiina kye ekya NRM bamweganye.

Omu ku bannamateeka ba Mbabazi  Severino Twinobusigye agamba poliisi terina buyinza buyimiriza Muntu waabwe.

Ate e Mbale abaseriikale ba poliisi nga bakulembeddwamu aduumira ebikwekweto bya poliisi mu ggwanga Andrew Felix Kaweesi bayiiriddwa mu bitundu ebyenjawulo nga era emisanvu girabiddwako ku luguudo oluva e Mbale okudda e Kampala.

Kaweesi agamba Mbabazi alina okugondera amateeka.