Amawulire
![Ebya TV za digito bituuse mu palamenti](https://www.dembefm.ug/wp-content/uploads/digital-migration.jpg)
Ebya TV za digito bituuse mu palamenti
Ensonga y’okujjako TV ezitali za digito ku mpewo etuuse mu Lukiiko olukulu olw’eggwanga
Ensonga eno ereeteddwa omubaka wa kawempe mu bukiikakkono Latif Ssebaggala agambye nti afunye okwemulugunya okuva eri abantu be nti tebakyalaba bigenda mu maaso mu ggwanga.
Omubaka ono agambye nti era abantu abamu balowooza nti kyakolebwa ku lunaku eyali ssabaminisita Amama Mbabazi lweyalangirira nti wakwesimbawo kale ng’abantu bakirabamu eby’obufuzi.
Ono awagiddwa ababaka okuba Jack Wamai Wammanga agambye nti TV za digito za bbeeyi nnyo nga bannayuganda tebazisobola era nga gavumenti yandibadde ezigaba.
Yye sipiika Rebecca Kadaga agambye nti ebirango byalagibwanga ku TV kyokka tekyavaayo bulungi ku kiki ekinabaawo ssinga abantu tebagula TV za digito.
Wabula ababaka okubadde Moses Balyeku ne Ibrahim Semuju Nganda baawukanye ku bannaabwe nebategeeza nga bannayuganda bwebalina emputtu nga bangi besisiggiriza okugula bu TV buno nga balowooza gavumenti esaaga.
Minisita omubeezi akola ku byebyuuma bikali magezi Nyimbi Thembo agambye nti abantu balina okussa ekitiibwa mu nsalessale era nga nabo bajja kugenda mu maaso nga babangula abantu ku bwetaavu bwa bu TV buno.
Minista agambye nti emikutu gya TV gyegyalina okukubiriza ba kasitoma baagyo okugula TV za digito kyebataakola.