Amawulire

Ogwa Bobi Wine gujulidde gwa Sebutemba

Bya Ruth Andera ne Benjamin Jumbe

Omulamuzi wa kooti ya Buganda Road owe ddaala erisooka Acaa Ketty Joan ataddewo olwanga 17^th Sebutemba okutandika okuwulira omusango gw’omubaka wa Kyadondo East Robert Kyagulanyi Ssentambu amanyiddwa nga Bobi Wine, ogw’okujemera ebiragiro bya poliisi.

Bobi Wine alabiseeko mu kooti amakya ga leero wabula omuwaabi wa gavumentoi Barbra Kyomugisha nategeeza nti, abajulizi be webali naye babadde tebanayitibwa.

Bobi Wine avunanibwa n’abantu abalala 4 okwekobaana nebajemera ebiragiro bya poliisi.

Mu kusooka Bobi Wine nga tanayingira mu kooti, ayogeddeko ne banamwulire, nagamba nti ekigendererwa kya gavumenti okubaggulako emisango gino, kwekubanafuya okubajja ku mulamwa.

Wabula agambye nti byonna byebakola nti tebijja kusoboka.

Abavunanwa abalala kuliko muganda we Fred Nyanzi, Julius Katongole, David Lule ne Edward Sebuufu amanyiddwa nga Eddie Mutwe.

Bano bavunanibwa okukuba olukungaana olumenya amateeka ku City Square, nga 11^th July mu 2018 bwebaali bekalakaasa okuwakanya omusolo gwa OTT.