Amawulire

Abazigu bayingiridde amaka ga ssentebe wa NRM

Bya Sadat Mbogo

Poliisi mu bitundu eby’e Mpigi etandise okunonyereza ku bazigu abaayingiridde amaka ga ssentebe wa NRM ku kyalo Buseera mu muluka gw’e Ggolo mu ggombolola y’e Nkozi, nebamukolako obulabe.

Ono ategeerekese nga ye Aloysius Jjunju; abamulumbye kigambibwa baabadde mu byambalo by’amagye ekiro mu matumbi budde.

Baalese bamukubyekubye n’abamakaage kyokka nga ekitabudde abantu kwekubeera nga bano baakonyekonye enju yonna nebajikuulamu enzigi n’amadirisa era nga byonna byalekeddwa ku ttaka.

Okusinziira ku bamu ku batuuze mu kitundu abakulembeddwa Lodovico Kirangwa, balumiriza abaserikale abalwanyisa envuba embi ku nnyanja nti bandiba nekkobaane ku nsonga eno kuba baludde nga beewera okukola olulumba ewa ssentebe ono bazuule oba y’atuusa n’okusaasanya ebyeyambisibwa mu kuvuba ebitakkirizibwa mu mateeka.

Kaweefube waffe owokwogerako n’abakulira okulwanyisa envuba embi mu bitundu eby’e Mpigi agudde butaka kuba essimu zaabwe ezimanyiddwa tezibaddeeko.