Amawulire

Okubala abantu-abalalu babigaanye, mu kampala batono ababaliddwa

Ali Mivule

August 28th, 2014

No comments

census sevo

Olunaku olusoose okubala abantu lufundikiddwa kyokka nga tekubuzeemu bujogoli

E Lyantonde abadde katemba , ababala nga bezooba n’abalalu abagaanye okubabala

Bakedde bukeezi nga bulijjo kyokka bano olubatuseemu nebabuna emiwabo

Atwala eby’emiwendo gy’abantu e Lyantonde Muhamad  Mwesigwa agamba nti kati basazeewo okudda ku balamu kubanga abalalu kirabika babalemye

E Masaka abakulembeze b’amadiini beebakulembeddemu okubalibwa nga ssabasumba w’essaza lye Masaka John Baptist Kaggwa asabye abantu obutayingiza byabufuzi mu nteekateeka eno bagende babalibwe

Yye atwala obugwanjuba bw’essaza lya Buganda, Godfrey Makumbi agambye nti nga taata bw’alina okumanya omuwendo gw’abaana be okubategekera , ne gavumenti ky’eyagala okusobola okutegekera abantu baayo.

Yye disitulikiti Khadi we Masaka Sheik Swaibu Ndugga asabye abantu bonna okukolagana n’ababala nga baddamu ebibuuzo mu butuufu.

Mu Nyendo Senyange e Masaka, abalondoola okubala babiri bagobeddwa ku lunaku lwebasoose okukola

Amyuka omuwandiisi w’ekitundu kino Muhamad Nfitemukiza agambye nti Sandra Namagga ne Jane Francis Nantongo babadde balina kulondoola kitundu kye Kitovu kyokka nga baakeereye okugenda ku mirimu ekikereyesezza buli kimu

Okuddako mu bitundu bye Arua, abaayo babadde beemulugunyizza ku kubala abatali bannansi

Arua erimu abantu bangi ng’abamu bayindi, aba Congo n’abava mu South Sudan era ng’abatuuze babadde balowooza nti tebalina kubalibwa

Wabula omwogezi w’akakiiko akakola ku kubala abantu Richard Obia agambye nti bawandiisa buli Muntu n’abasaba okuleka abagwiira babalibwe.

Mu Disitulikiti ye Moyo, abasangiddwa mu ma loogi bagaanye okuddamu ebibuuzo mu butuufu ate abamu bapenedde ddala enteekateeka eno

Addukanya loogi emanyiddwa nga Poi travelers lodge Edward Dramani agambye nti tebasobola kukaka ba kasitoma kwogera bibabuuziddwa ng’abasinga obwedda bagamba nti tebamanyi byakuddamu

Okubala kuno era kukomye mu muluka gwe Kali nga wano wakayanirwa aba disitulikiti ye Yumbe ne Moyo

Buli disitulikiti ewerezzaayo ababala abantu

Okuddako mu kibuga, kampala, abantu bangi bakedde kwebuuza lwaki tebannalaba bababala  kyokka ng’awamu babalabye

Nga Tutambulira e Luwafu gyetugwiridde ku Deus Arinaitwe abadde abala abaayo era nga tumusanze abuuza bibuuzo naye ng’ababuuzibwa abamu baddamu byebagaala

Bbo nno ababaka ba palamenti balina endowooza za njawulo ku nteekateeka eno.

Abamu bagamba nti ssi mbi naye enteekateeka eno tetegekeddwa bulungi.

Twogeddeko n’ababaka, Joseph Ssewungu ne John Simbwa nga bonna bandowooza nti enteekateeka ebuzeemu

Mu kanyomero ka manya ekibuga kyo n’abakirimu, tetugenda kuva ku mulamwa gw’okubala abantu

Bannakampala bangi bakedde kwebuuza babala nga tebabalabako era nga KCCA ekkirizza nti bannakampala tebabaliddwa nga bwekyabadde kirina okuba

Leave a Reply

Your email address will not be published. Required fields are marked *